Síðustu 10 ár hef ég starfað innan ferðageirans, þar byrjaði ég að vinna sem leiðsögumaður í fjórhóla og fjallahjólaferðum, færði mig svo yfir í prívat ferðir þar sem ég hef verið ökuleiðsögumaður í ferðum með fjölskyldur, hjón, pör og aðra minni hópa út um allt okkar fallega land.

Bláskógabyggð hefur alltaf heillað en það var svo í byrjun desember 2021 þegar ég og konan mín, Þóra Kristín Þorkelsdóttir fluttum hingað með börnin okkar þrjú úr vesturbænum. Við höfðum enga tengingu hingað en staðurinn heillað algjörlega og hefur haldið því áfram eftir því sem tíminn líður og því meira sem við kynnumst af fólkinu hér sjáum við að hér býr, öflugt fólk sem lætur hlutina gerast. Allir hafa tekið okkur vel og ég fyllist innblástri af því að sjá hvað fólk hér hefur verið að gera þegar það kemur að því að byggja upp ferðaþjónustu í bland við góða innviði til búsetu og innihaldsríks lífs.

Hér viljum við búa um ókomna tíð og ala upp börnin okkar. Þess vegna ákvað ég að bjóða mig fram hér, því ég vill taka þátt í að byggja á því góða hér og mynda sterka framtíðarsýn í ferðaþjónustu og almennum lífsgæðum fólksins hér á svæðinu.

Ég lifi eftir þeim gildum að lifa og læra, ég er ekki fullkominn frekar en næsta manneskja, en ég vill alltaf taka ábyrgð á því sem ég geri og læra ef betur mætti fara.

Byggjum sterka og skýra framtíðarsýn saman.